ما بين التربيه العسكريه و طاقيه السفاره
السلام عليكم و رحمه الله
مساء الخير عليكم جميعا
اتخدت اخيرا الخطوه اياها
و شجعت نفسى و اقعدت اشجع الناس
و قلت أقدم فى التربيه العسكريه بتاعت نص السنه
شلت الحاجات اللى عاوزنها كلها و طلعت على الجامعه
و انا لسه داخل لقيت الراجل على الباب بيقولى التربيه العسكريه من الباب التانى اللى جمبه
؟؟؟؟
بعدين يعنى
فرقت ايه الباب ده من ده ما هاما فى نفس الحته و بيدخلوا على نفس المكان
ما علينا
دخلنا و فضلنا ماشيين على طول فى شمال لغايه ما وصلنا لمكان التقديم
شباك عااااااااااالى لازم امد ايدى ( او انط ) للقصيرين عشان ادي الراجل اللى فوق الورق
المهم الراجل اللى هناك فكرنى بقصه كنت قاريها فى مجله ميكى
بس مش لاقيها فمعرفتش ارفعها
المهم ميكى رايح سفاره يسأل على حاجه استقبله الراجل الفراش على الباب
قاله عاوز ايه قاله عاوز اقابل السفير
راح الفراش قلع طاقيه الفاشين و لبس طاقيه السكرتير و قاله اى خدمه
لازم تحجز معاد مع السفير عشان تقابله
قاله ده حاجه مهمه راح قلع السكرتير طاقيه السكرتير و لبس طاقيه السفير و قاله
اى خدمه عاوز ايه
القصد
ان الراجل اللى فى الشباك كان عامل زى الراجل بتاع المجله
يخلص الورق بتاع جزء من الطابور
و يقلع الطاقيه و يلبس طاقيه الموظف التانى و يخلص ورق اللى خلصوا ملى الاستمارات
و فى الاخر قلع الطاقيه بتاعت الموظف التانى و لبس طاقيه موظف الختم
و قعد يخم الورق
ااااااااااه يا بلد
بس ما شاء الله عليه سريع فى شغله
يمكن لو جابوا 3او 4 موظفين هياخدوا وقت اكتر منه
اشى يفطروا و يحكوا و يريحوا
ههههههههههههههههههه
يلا اشوفكم على خير
و كل طاقيه و انتم طيبين
4 التعليقات:
Raghda Rashad رغده رشاد يقول...
السجن للجدعان....
اقصد التربية العسكرية
يعنى كل الناس هتبقى بتتفسح و انتوا
بتتربوا عسكريا
حلوة و الله
(حب الوطن فرض عليا)
صامدون صامدون
غير معرف يقول...
هههههههههههه
فكرتنى يا ايمن
والله اسلوبك فى الكتابه جميل جدا نا قريت القصه كلها مع انى مشارك فيها
بس فين دورى يا ندل انت ناسى ان انا اللى مفكرك بالقصه فى ميكى !!!!!
Dr.Abdo
Dr Gad يقول...
يابني الغي موضوع الكلمه التاكيديه دي في المدونه عشان بيخنقني
يلا ياعم اديني نازل بكره و ربنا يسهل وناخدها سوا جماعه هههههههههههههههه
Dr Nemo يقول...
احنا ممكن نقلبها فسحه برضه يا رغده
بالذات ان لغايه دلوقتى ناس كتير اعرفها رايحه التربيه العسكريه
ربنا يستر و منطردش
_____________________
شكرا يا سى عبده
ماشى يا عم عندك حق
بس انا ملقتهاش
اتغظت اوى
مش فاكر فى انهى مجله
----------------------
يا مسهل يا جاد
لحقتوا تقدموا و لا ؟