الحرب على غزه
يتهيئلى من اغرب الحروب اللى فى العصر الحديث
البمب فى مواجهه القنابل الذكيه
البنادق ضد الدبابات
الهاون فى مقابل الطائرات
الغريب أوى ان اسرائيل ظبطتها بحيث انها متحرجش حد
امريكا بالذات
فبوش ماشى فمحدش هيقعد يبرطمله
و اول ما اوباما مسك وقفوا عشان ميحطهوش فى احراج
و الغريب برضه ان كل الاطراف ادعت النصر
مع ان كلهم اتهزموا
اسرائيل ادعت النصر و هى مقدرتش توقف الصواريخ و لا تقضى على حماس
كل اللى عملته انها موتت مدنيين و دمرت بيوت بس
حماس ادعت انها انتصرت
مع ان غزه ادكت مع 1300 شهيد و 5500 جريح
و خساير بالمليارات .. مش عارف فين الانتصار بتاع حماس هنا
عباس كان موقفه غريب جدا
حسيت انها مش بلده و لا أرضه
محاولش يبذل مجهود شويه فى الموضوع
الله يرحمك يا ياسر عرفات
كان هيعرف يتصرف فى الموضوع ده
ماكنش يبقى فى انقلاب اصلا
مصر بتقول انها انتصرت دبلوماسيا
مع ان اسرائيل موقففتش ضرب الا لما زهقت
و فى الاخر راحت تمضى اتفاقيه مع امريكا عن تهريب السلاح عبر الحدود
اكنها مش حدود ابونا
و الغلبان بقه بتاع الامم المتحده
اللى لا بيهش و لا بينش
مش عارف يعمل اى حاجه
محطوط ديكور
العرب قالوا انهم انتصروا لما طلعوا قرار من مجلس الامن
مع ان اسرائيل نفضتله و قعدت تضرب اسبوع بعديه
و العالم كله بيشجب و يدين و يعتبر هذا انتصار
و تهتف الجماهير العربيه لطرد السفير الاسرائيلى من فنزويلا
اكن لما اطرد خلاص
الضرب وقف
هنفضل طول عمرنا نشحت من الناس حلول لمشاكلنا
حاولنا نحل مشكله غزه بكل الطرق الخارجيه
و نطلب من الناس انهم يوقفوا اسرائيل
و محدش حاول انه ياخد خطوه ايجابيه من نفسه
صدق من قال
يا أمه ضحكت من جهلها الأمم
بس العزاء الوحيد
و الانتصار الوحيد
لو دم الشهداء لم يضيع هدر
لو غذت هذه الدماء الصحوه العربيه
لو بعثت الامه العربيه من جديد
لو هب المسلمون على قلب رجل واحد
ساعتها بس
سنقول هنيئا لكم يا أهل الفردوس
فلم تذهب دمائكم هدر
فقدر رويت بها نبته الحريه
و نمت بها العزه و الاباء
اللهم ارحم شهداء غزه
