9:47 م - Posted by Dr Nemo - 4 التعليقات


ما بين التربيه العسكريه و طاقيه السفاره

السلام عليكم و رحمه الله
مساء الخير عليكم جميعا
اتخدت اخيرا الخطوه اياها 
و شجعت نفسى و اقعدت اشجع الناس
و قلت أقدم فى التربيه العسكريه بتاعت نص السنه
شلت الحاجات اللى عاوزنها كلها و طلعت على الجامعه
و انا لسه داخل لقيت الراجل على الباب بيقولى التربيه العسكريه من الباب التانى اللى جمبه
؟؟؟؟
بعدين يعنى
فرقت ايه الباب ده من ده ما هاما فى نفس الحته و بيدخلوا على نفس المكان
ما علينا
دخلنا و فضلنا ماشيين على طول فى شمال لغايه ما وصلنا لمكان التقديم
شباك عااااااااااالى لازم امد ايدى ( او انط ) للقصيرين عشان ادي الراجل اللى فوق الورق
المهم الراجل اللى هناك فكرنى بقصه كنت قاريها فى مجله ميكى 
بس مش لاقيها فمعرفتش ارفعها
المهم ميكى رايح سفاره يسأل على حاجه استقبله الراجل الفراش على الباب
قاله عاوز ايه قاله عاوز اقابل السفير
راح الفراش قلع طاقيه الفاشين و لبس طاقيه السكرتير و قاله اى خدمه
لازم تحجز معاد مع السفير عشان تقابله 
قاله ده حاجه مهمه راح قلع السكرتير طاقيه السكرتير و لبس طاقيه السفير و قاله
اى خدمه عاوز ايه
القصد
ان الراجل اللى فى الشباك كان عامل زى الراجل بتاع المجله
يخلص الورق بتاع جزء من الطابور
و يقلع الطاقيه و يلبس طاقيه الموظف التانى و يخلص ورق اللى خلصوا ملى الاستمارات
و فى الاخر قلع الطاقيه بتاعت الموظف التانى و لبس طاقيه موظف الختم
و قعد يخم الورق
ااااااااااه يا بلد
بس ما شاء الله عليه سريع فى شغله
يمكن لو جابوا  3او 4 موظفين هياخدوا وقت اكتر منه
اشى يفطروا و يحكوا و يريحوا
ههههههههههههههههههه
يلا اشوفكم على خير
و كل طاقيه و انتم طيبين




1:23 ص - Posted by Dr Nemo - 0 التعليقات
كان بيصحى كل يوم الساعه 6 و نص

يا دوب يلحق يلبس و يفطر و ينزل عشان يتمشى لمدرسته

كان بيعدى كل يوم قدام مبنى كبيــــــــــــر

و يبصله شويه و يمشى

و ينسى اللى شافه لما بيندمج فى احداث حياته العاديه

كان بيسمع طراطيش كلام من ابوه

برلمان و حكومه و حريه

بس مكانش فاهم حاجه

او بالاصح محاولش يفهم حاجه

و تمر الايام و كبر و دخل الثانويه و هو بيعدى جنب نفس المبنى كل يوم 

بس كان فضوله بيزيد يوم عن يوم

بس اول ما يوصل المدرسه بيندمج و ينسى كل حاجه

لغايه ما جه اليوم اللى كان بيقلب فى التلفزيون

لقه راجل اسمرانى رفيع

حاجه جذبته ليه

قعد يسمعه

فى حاجه شدته اكتر

مش عارف ايه هى

فصاحته

و لا شبابه المتدفق

و لا ذكاءه

و لا هدوءه

و لا دمه الخفيف

مش عارف

بدأ ينجذب للراجل

و بدأ يتابعه اكتر و اكتر

بدا اعجابه يزيد

حاول يستفسر عنه عرف انه شخص عادى

رشح نفسه للانتخابات فى امريكا

اتصدم 

امريكا 

اللى درسوا انها دوله قامت على العبيد

على دماء السود

دلوقتى بيترشح لرائستها واحد اسود

؟
امتزج اعجابه بنوع من الشفقه

حزنا على الراجل اللى حبه

بس الظروف اللى حواليه هتوقفه

و دخلت فتره الامتحانات

و بدأ ينقطع عن متابعه التلفزيون

و نسى كل شىء عن الموضوع تقريبا

لغايه ما فى يوم بيعدى على بتاع الجرايد

لقه بالبونط العريض

فوز المرشح لاسود برئاسه امريكا

اتسمر مكانه

و ذهل 

اخد مده لغايه ما استوعب الامر

استو عب الحقيقه

طلع يجرى فى الشوارع

لسه تأثير الصدمه عليه

قعد يبص فى وشوش الناس


و يقول فى سره

الظروف

المستحيل

الحماس

الذكاء

الأنا 

و الناس ...........

بص للمبنى الكبير اللى كان بيعدى عليه بقاله سنين

ثم ابتسم ابتسامه واسعه 


11:36 م - Posted by Dr Nemo - 3 التعليقات

" هتلاجى صندوجين فى الاوضه
صندوج أحمر و صندوج أزرج 
سيب الصندوج الأحمر و حط فى الأزرج "
قعد يردد الجملتين دول طول ما هو ماشى
ما انهارده يوم الانتخابات بتاعت الكفر
و قالوله ان الحاج رشوان حبيب الكفر مرشح نفسه
ووعدهم انه يدخل الكهربا فى الكفر لا و كمان مايه المشروع
يعنى تدور حته الحديده دى تنزلك مايه نضيفه
يا حلاوه يا ولاد !!!
و قعد يردد الجملتين دول طول ما هو ماشى .........
" على فين يا حاج بدرى كده "
لف وراه و رد على محمدين صاحب الصوت 
" رايح انتخب يا خويا ...
مش هتروح و لا اييييه ؟ "
" لا مش رايح
جال اروح انتخب جال هو اللى حالتى يجدر ينتخب 
لا يا عم لا اعرفهم و لا يعرفونى 
سلامات "
و كمل فى طريقه و هو يلعن اللحظه اللى شافه فيها 
و شغله انه يردد الجملتين عشان مينساش
أصل عشان اهل الكفر مبيعرفوش يقروا و لا يكتبوا
علموا الحاج رشوان بأن اللى عايزه يبصم على ورقه و يحطها فى الصندوق الازرق
و ان الحاج مختار اللى نازل قدامه صندوقه لونه أحمر
" يا حلاوه يا ولاد
دا الحاج جال انه هيفتح مدرسه فى الكفر
يعنى هتطلع خلفتنا متنوره و متعلمه و تخش الجامعه فى مصر زى ولاد الذوات "
........
كان نقطه الشرطه اللى عاملين فيها اللجنه الانتخابيه بدأت تظهر
حواليها نخلتين كبار 
بيقولوا ان اللى زرعهم هو اللى عمر الكفر و أول واحد سكنها
" اه يا وعدى
لو تجوم من تربتك و تشوف الكفر و هو بينتخب
و تشوف الكهربا و المايه و المدرسه 
فينك من زمان يا حاج رشوان و دماغك العاليه دى
دا الكفر هيكبر و يبجى مركز جاااااااااد الدنيا دى كلها "
........
سمى الله و هو داخل اللجنه
و الماضى بيرميه وراه و المستقبل بيلعب قدامه
و فجأه
وقف مكانه
و ارتسمت الحيره على وجهه
فلم يكن هناك إلا صندوجين حمر 
................



12:24 ص - Posted by Dr Nemo - 7 التعليقات


زرافتيــــــن فى الغـــابه ماشيين 
من الشجر بياكلوا شمال و يمين
و حياتــهـم لعب فوق الطيـــــن
بس دايما اسعد من البنى ادمين
و عجبى،،،،،

زرافتين بيجروا طول النهار 
غلابه ملهمش بيت و لا دار
تنطيط و لعب جنب الأنـهار
مره مع الفيل و مره مع الفار
و عجبى،،،،،

إن اختلفوا يومين تلاقيهم راجعين
الرقبه فى الرقبه بشوق و حنين
إن سبتك غضـــب فقلبى حزيـــن
3 ايام و راجعلك و لا اقولك يومين
و عجبى،،،،،،

أبص على حالهم و أنام على جانبى
أحلم بحيــــاه بمبى فـــى بمبى
زى الزرافتين بس يا ترى دا ذنبى
انى عايش وسط بشر بيفوروا دمى
و عجبى،،،،،

يا ابن ادم بـــص للزراف و اتعلــم
لو فى خلاف اقعد مع صاحبك و اتكلم
متنشفش دماغك و تاخد جنب و ترخم
و بص لغيـــــرك و غلطاته و اتعلم
و عجبى ،،،،،




2:22 م - Posted by Dr Nemo - 1 التعليقات




سلام عليكم و رحمه الله و بركاته
عوده بعد طووووووووول انقطاع
حمد الله على سلامتى
و كل سنه و انتوا طيبين
عيد سعيد
و كحك لذيذ
المهم
كنت عاوز اتكلم عن موضوع صغنطوط كده 
الابتسامه
و ده هيجرنى غصبا الى موضوع الصداقه
كتير بقابل ناس فى الكليه
( هأتكلم بصيغه انا بس اقصد كل الناس )
بقابل ناس كتير كل يوم
منهم الصديق 
و الزميل و
و اللى اعرفه معرفه سطحيه
كلهم بسلم عليهم
( او معظمهم مش كلهم حقيقا )
بس ابتسامه عن ابتسامه تفرق
فى ناس بتشوف ابتسامه على وشه بس
ممكن يكون بيجاملك و ده شىء كويس لو انه مش زميلك اوى 
اهه خد فيك ثواب
ابتسامتك فى وجه اخيك صدقه
او بينافقك و ده موضوع تانى
فى ناس بتشوف الابتسامه فى عقله
بيحكم عقله فى الموضوع
يمكن عاوز يطلب طلب
او ليه غرض
سواء حميد او خبيث
برضه مش موضوعنا
فى ناس بتشوف الابتسامه فى قلبه
طالعه من قلبه
بيبتسم عشان بيحبك
عاوز يعبر عن اللى جواه
فطلعه فى باقه ورد
لا دا الابتسامه كمان اجمل من باقه ورد
صحيح السحر حرام
بس الابتسامه فى رأيي سحر جامد جدا
بس حلال
ممكن تشد الناس ليك
و يا سلام لو طالعه من قلبك
هتقولى ايه الفرق بين ابتسامه من القلب و ابتسامه مزيفه
انت هتحسها
الابتسامه اللى هتسحرك هى الابتسامه الحقيقيه
يا ريت منبخلش على بعض بالابتسام
ساعات الواحد بيكون واقع تحت ضغوط جامده
و مشاكل
فمتطلعش زهقك و مشاكلك على الناس
كل واحد فيه اللى مكفيه
دا لما يلاقيك بتبتسمله هيتشد ليك
هيحس ان حد بيخفف عنه مشاكل الدنيا
صحيح تبسمك فى وجه اخيك صدقه



----------------------------------------------------------

وصل مدى تدهور اللغه العربيه لهذا الحد المضحك
كنت راكب مينى باص
لقت العربيه النقل دى 


مكتوب عليها أهوتك ايه
يتهيئلى انها المفروض قهوتك إيه
و لا ايه
؟؟؟؟؟؟؟؟؟؟؟
يا امه ضحكت من جهلها الامم