زرافتيــــــن فى الغـــابه ماشيين
من الشجر بياكلوا شمال و يمين
و حياتــهـم لعب فوق الطيـــــن
بس دايما اسعد من البنى ادمين
و عجبى،،،،،
زرافتين بيجروا طول النهار
غلابه ملهمش بيت و لا دار
تنطيط و لعب جنب الأنـهار
مره مع الفيل و مره مع الفار
و عجبى،،،،،
إن اختلفوا يومين تلاقيهم راجعين
الرقبه فى الرقبه بشوق و حنين
إن سبتك غضـــب فقلبى حزيـــن
3 ايام و راجعلك و لا اقولك يومين
و عجبى،،،،،،
أبص على حالهم و أنام على جانبى
أحلم بحيــــاه بمبى فـــى بمبى
زى الزرافتين بس يا ترى دا ذنبى
انى عايش وسط بشر بيفوروا دمى
و عجبى،،،،،
يا ابن ادم بـــص للزراف و اتعلــم
لو فى خلاف اقعد مع صاحبك و اتكلم
متنشفش دماغك و تاخد جنب و ترخم
و بص لغيـــــرك و غلطاته و اتعلم
و عجبى ،،،،،
7 التعليقات:
Dr.yassmin يقول...
:) :) :) :)
حلوة جدا
هي دي بتاعت صلاح جاهين ؟P:
رغدة راشد يقول...
:)):)):))
بجد تحفة ياأيمن
بس انت شمعنى قولت الزرافة يعني؟؟؟؟؟؟؟
Dr Nemo يقول...
شكرا يا ياسمين
انا اللى كاتبها
بس كاتبها على وزن رباعيات جاهين
شكرا يا رغده
اشمعنا الزراف
طويل زيي يمكن
ههههههههه
تحسى انه مبيزعلش
مشفتش زرافه مكشره قبل كده
محمد صلاح أبو الكشفي يقول...
انا مصدقتش بصراحة ان انت اللي كاتبها
جميلة اوي يا نيمو ... مخبي عننا المواهب دي كلها ليه ؟ :D
-------------------
ملحوظة بس : ياريت تشيل الحروف التأكيدية دي
Dr Nemo يقول...
ربنا يخليك يا ابو صلاح
دا بس من ذوقك
بس انا اللى كاتبها بجد
الحمد لله
mango يقول...
تحفة اوى يا ايمن بجد
صحيح بص للزراف و اتعلم
بس انا مكنش ينفع اطلع زرافة ابدا ممكن اى حاجة تانية هههههههههههههههه
go on nemo
Dr Nemo يقول...
شكرا يا همسه على التشجيع
ربنا يكرمك
ان شاء الله نكمل
هابقى اعمل جنينه حيوانات
مش زراف بس