على هامش الحياه:
سلام عليكم و رحمه الله و بركاته
جربت تنزل قبل كده تمشى فى الشارع و تبحلق فى وشوش الناس
جربت تتفرج على عيون الناس
و تدخل فى أعماقهم
هتلاقى معانى كتيره
حب و كره
تعب و راحه
اخلاص و خيانه
يقظه و غفله
دا الأغلبيه ,,
بس فى ناس تبص فى عينها تحس بالقهر و الانكسار
فى ناس تبص فى عينها تحس انها عايشه على هامش الحياه
تبص عليهم و تقول ايه لزمته فى الحياه
؟؟؟
استغفر الله العظيم
مش ايه لزمته بس تقول دا عايش ليه
كل واحد فينا بيكون عايش لأحلامه
طموحه و مستقبله
أفراد مسئول عنهم و خايف عليهم
بس تبص لواحد من الفئه دى
تلاقى مثلا أيتام عايشين مع بعض
فى غرفه تحت الارض
معندهمش اى حاجه من مقومات الحياه الأساسيه
المسئول عنهم اختهم الكبيره ( 16 او 17 سنه )
بتشتغل فى البيوت مثلا بكام جنيه
عشان اللى يجيى يتصرف على الأكل و ميكفيش كمان
تبص عليهم و تستغرب
و تبص على ناس تانيه بتضيع مئات بل الالاف الجنيهات فى يوم لمجرد متع لحظيه و تتخنق
يا ترى أكيد فى حكمه
اكيد ربنا مخلقهمش و نسيهم
تعالى الله عن ذلك
تبص فى عين الناس دى
ممكن تلاقى رضا و ممكن تلاقى سخط
ممكن تلاقى حب و ممكن تلاقى كره
و ممكن تلاقى حاجات كتيره من دى بتتناقض و تتصارع فى نفس الشخص
اقف مع نفسك
فكر شويه
يا ترى هل خلقوا لاجل لا شىء
هل خلقوا ليشقوا
هل نحن مسئولون عنهم
ام لا
هل ما نقوم به من هتافات انسانيه و كلام لا يودى و لا يجيب هيعفينا من مسئوليتنا
هل لما نجيب شويه من الناس دى نطلعهم من برا الهامش لسويعات قليله
ليعودوا بعدها الى الهامش او ابعد من ذلك محملين بالحسره و الحزن
و بعد كده نحتفل باللى احنا عملناه اكن احنا حلينا مشكلتهم
هل فعلا حليناها
يا ترى لما نقابل الله ماذا سنقول
اكنا لا ندرى
ام كنا ندرى و نغض بطرفنا عنهم
لا أدرى
حتى لو لا تدرى
لماذا لم تبحث عنهم فى الهامش
لماذا
لماذا
؟؟
5 التعليقات:
OPTIMESTIC يقول...
السلام عليكم
ازيك يا ايمن ... بقيت الفتى الخفي اللي مفيش حد بيشوفك خالص ... :)
ايها الفتى ....
مبسوطة اني صاحبة اول تعليق في هذا الموضوع ...
يو ار رايت ... اللي فهمته ان انت بتتكلم عن الناس اللي بتعمل جزء من مهمة مش بتكملها للاخر .. فبالتالي مش بتفرق كتير ...
من رأيي ان الاخر دة بعييييييييييد اوي ... يعني محدش هيقدر يكمل حاجة للاخر ...
بس لو كل حد فينا كويس في مكانه ... بيعمل اللي عليه صح وبكفاءة ... مكنتش هتشوف الهامش دة ...
انا مش بقول الحق على الناس اللي في الهامش ....
انت سألت و قلت احنا مسؤولين ولا لا ؟؟؟
بغض النظر عن معنى كلمة احنا ... ولا كلمة مسؤوولين الل انت تقصده
بس الاجابة اه ...
لان احنا عندنا شماعةكبيييييييرة اسمها الظروف و الحظ ... ظروفي كدة أعمل ايه ...
هو حظه كدة ... انا اعمله ايه ...
و بالتالي كل واحد في الهامش بيرضى بحاله .. مع بعض من السخط والكره ... او قناع من الرضا لتقمص دور المثالية والافلاطونيه ( في حالة الناس اللي تقدر تغير ظروفهم بس خيبانين او كسلانين )
وكل واحد برا الهامش ... بيشوف الناس المقهورة اللي انت بتقول عليها و يمصمص شفايفه ويقول يا عيني ... وبعدين يمشي خطوتين ويقول خليني في نفسي ... يا اما يقول ربنا خلاني اشوف الشكل دة عشان احس بالنعمة اللي في ايدي ... وكأن الهامش دة معمول مخصوص عشان بسلامته يحس بالرفاهية اللي هو عايش فيها ...
.....................
في الاخر ... كل حد لو كان في مكانه كويس هيفرق كتيير ... لنفسه .. وللهامش
لو خرجت حد من الهامش دة بطريقة مدروسة وصح .. حتى لو لمدة دقايق ... ممكن تكون انت حدث يغير مسار حياته و لو درجة واحدة من 180 ...
طولت عليك ... بس دة من وجهة نظري الفقيرة للغاية ....
Dr Nemo يقول...
اولا اهلا بيكى يا مروه
اول مره تنورينى يا رب دايما
انا مبتكلمش بس على اللى مبيكملش المهمه للاخر انا بتكلم بشكل اساسى على النقطه اللى عبرتى عنها حسن منى
... بيشوف الناس المقهورة اللي انت بتقول عليها و يمصمص شفايفه ويقول يا عيني ... وبعدين يمشي خطوتين ويقول خليني في نفسي ... يا اما يقول ربنا خلاني اشوف الشكل دة عشان احس بالنعمة اللي في ايدي ... وكأن الهامش دة معمول مخصوص عشان بسلامته يحس بالرفاهية اللي هو عايش فيها ...
الهامش دا هنتحاسب عليه
احنا لو النور او الماء قطع ساعتين تلاته
مبنبقاش مستحملين
فمبالك بناس عايشين عيشه لا توصف
سبحان من زرع فى قلوبهم الرضا و سقا نبتته بايمانا
احنا دورنا اه ندعلهم بس مش كده و بس
هتتسئل عنهم
اعمل اى حاجه
متكتفيش بانك تلاقى واحد فى الشارع تديله صدقه
دا اللى محتاجين و متعففين اكتر
انت اللى تروحلهم
انت اللى محتاجلهم
اكتر من ما هم محتاجينلك
بجد انت اللى محتاج و فقير يوم القيامه
و هما بصبرهم الأغنياء عن الله
شكرا و يا ريت تنورينى دايما
OPTIMESTIC يقول...
ربنا يكرمك يا ايمن على الترحيب الحلو دة ...
بس دي مش اول مرة ازور المدنة الحلوة دي ... دي المرة التالتة او الرابعة
وكان ليا كومينت ...
انت كلامك مظبوط ... احنا علينا مسؤولية كبيرة ناحية الناس دي ... بس الناس دي مش لازم دايما يتعاملو مع نفسهم كضحية وبس .. ويفضلوا زعلانين وتعبانين ... في خطوات ممكن ياخدوها .. مش ناقص غير ارادة ... لو فكرتهم انهم بشر وعندهم ارادة .. هتبقى انت اعظم حدث في حياتهم ..
Dr Nemo يقول...
اعطنى سناره و لا تعطنى سمكه
انا معاكى بس الاول الحقنى من الجوع بسمكه و علمنى اصطاد و ادينى سناره بعد كده قولى يلا اعتمد على نفسك
Nermien Hani يقول...
لأ دي مسمهاش المثالية الحمقاء او الساذجة
ده الصح
بس للاسف في ناس بتعتبر الصح ده انه ضعف وبيستغلوا الموقف اكتر عشان يهدوا اكتر اللي انت بتحاول ترممه
بس في اي موقف بين اي اصدقاء مينفعش طرف واحد يتنازل عشان ده لو حصل الموضوع هيفشل في الاخر الاتنين يتنازلوا عشان يحسوا بقيمة التنازل ويقدروه لبعض