لكن هذه وجهه نظرى و هذا درب حياتى الذى قررت أن أسلكه
ربما أتنازل عن بعض حقوقى من أجل الاخرين
ربما لا يكون هذا من حقهم لكن أتنازل عنه طواعيه من نفسى
احاول أن اقتدى بفهمى لحديث رسول الله صلى الله عليه و سلم
ما انتقم رسول الله لنفسه في شيء قط إلا أن ينتهك حرمة الله فينتقم الله به
كنت معدى على الناصيه اللى بعدى عليها دايما من سنين
فببص على البيت لقيته فضى و شالوا الشبابيك و الموبليا و كل حاجه و حوطوا المبنى بخيش
بعدها بكام يوم لقيت البيت متاكل نصه و ونش دقاق عمال يكسر فيه
لمسه واحده و يقع حته من الحيط
بصيت على المنظر ده
و لمعت عينى
فكرنى بحياتنا اليوميه
و علاقتنا الشخصيه
بنقعد نبنى سنين فى علاقتنا مع اصدقائنا
نحط طوبه على طوبه
و نقوى الروابط بينا بالمحبه و الموده كأنها الأسمنت بالظبط
و ممكن نيجى فى لحظه واحده
بكلمه واحده أو موقف واحد( زى لمسه الونش الدقاق )
أروح هادد كل حاجه
سهل جدا نكسر
فى لحظه
فى ثانيه
بكلمه
بموقف
صعب أن احنا نرمم مبنى
زى العلاقه بالظبط
لو حصل شرخ تحتاج الى جهد لدرء الصدع
فى ناس بتستسهل و تروح تهد المبنى
مثال
واحد صديق حصل موقف من واحد أنتيمه أوى
كان وعده بحاجه بس ماطل و سوف فيها لغايه ما اتزنق صديقى فيها
و خد منه موقف جامد
و ازاى يعمل كده و خاصمه من ساعتها
انا مسمعتش الموقف من الطرف التانى
بس مبدئيا اللى ظاهر أن العلاقه اللى كانت قويه
و اتبنت على مر الوقت
وقعت من موقف واحد
طب ايه الحل
هل أنت عندك استعداد أنك تضحى أو تيجى على نفسك شويه
عشان ترمم البيت و لا هتهده و تبنى واحد تانى
؟؟؟
يا ترى فى حاجه فعلا اسمها المثاليه الحمقاء
أو المثاليه الساذجه
لنا وقفه اخرى ان شاء الله
تابعونا
11 التعليقات:
Dr.Harmonic يقول...
نيموو...أرفعلك القبعة تحية ليك..
و بالنسبة لرأيي في الموضوع دة ان فعلا أي حاجة من غير ما حدد بتتبني في سنين و تتهد في ثانية...:(
حتى الصداقة مةما كانت قوية... و زي ما انت قولت الأصدقاء بيخسروا بعض من مواقف....و دايما أحسن حل يا نيموو هو العفو عند المقدرة زي ما الرسول "عليه الصلاة و السلام" كان بيعمل......
Dr Nemo يقول...
او شكرا يا سيدى على رفع القبعه
و أقدر لك هذه اللفته الجميله
فعلا ما أسهل الهدم
و ما أصعب البناء
قد يكون الهدم حل مؤقت أو مسكن لمشكله ما
و لكن ليس الشديد بالصرعه
بل الشديد من يملك نفسه عند الغضب
شكرا و مستنيك دايما
sara يقول...
شوف يا ايمن
مش فى كل الاوقات الواحد يقدر يرمم المبنى
لما يكون فعلا آيل للسقوط يبقى لازم نتحمل الخساير.
خساير انهاء العلاقة يمكن تكون افضل من انك تكمل فيها وضحاياها يكونوا انت واحد منهم, دا فى الغالب هيحصل هيحصل
بس تفرق فى التوقيت..
لما تبدأ الشروخ فى الظهور لازم الواحد يقف مع نفسه ومع الناس لحظة
يعرف الخلل فين, لو فيه يعالج نفسه قبل الشروخ دي عشان ما يكونش بيصلح فى الهوا
متابعين يا فندم Go on
Dr Nemo يقول...
طبعا فى مبانى لازم تتهدم
بس يا ترى انت مخدتش بالك ليه من الشروخ الصغيره
و هى بتكبر
ليه ملحقتهاش من الول و مرممتهاش
هى الفكره الأساسيه ان الهدم أسهل من البنى لكن أنهى أفيد على المدى البعيد
بس دا فى الاول و فى الاخر بيعتمد جزء كبير على اللى قدامك
يا ترى هو بايعك و لا شاريك
؟؟
شكرا يا ساره على مرورك
Dr.yassmin يقول...
بالنسبة للنقطة الأولى يا أيمن ، و هي انك اخترت المثالية طريق لحياتك ، فلازم تعرف حاجة مهمة اننا مش مطالبين اننا نثور بس لما تنتهك حرمات الله ، الرسول عليه افضل لصلاة و السلام كان مش بينتقم لنفسه ابدا عشان الناس ميعتقدوش انه هامه مصلحته و يقتنعوا تماما ان اهم حاجة في حياة الرسول هي رسالته ، لكن في حياتنا احنا كمان مطالبين اننا ناخد حقوقنا و ندافع عنها ،مش نقول انها ليست حرمة من حرمات الله يبقى خلاص ، هتقوللي العفو عند المقدرة ، هقوللك ماشي (هات حقك الأول و بعدين ابقى سيبه للي انت عايزه ) مش تسيب حقك و تقول انا سايبه بمزاجي .... المؤمن القوي خير من المؤمن الضعيف ... و الله اعلم
النقطة التانية : العلاقة التي تبنى في سنين و تهدم في ثواني ... لم تكن مبنية على الحب الحقيقي من البداية ... مفيش حد بيحب اصحابه بجد و يقاطعهم من موقف واحد ... دي ندالة لا مؤاخذة
لكن ساعات الواحد بيكتشف انه لازم هو اللي يهد ... يعني صورة البيت اللي انت حاطتها ... البيت مش هو الي بيقع من نفسه ... الناس هي اللي بتهده ... اكيد عشان شايفين ان هده ضرورة ... في هذه الحالة مقدرش اقول اكتر من اللي قالته سارة .. و انا مقتنعة بيه تماما:
،مش فى كل الاوقات الواحد يقدر يرمم المبنى
لما يكون فعلا آيل للسقوط يبقى لازم نتحمل الخساير.
خساير انهاء العلاقة يمكن تكون افضل من انك تكمل فيها وضحاياها يكونوا انت واحد منهم, دا فى الغالب هيحصل هيحصل
بس تفرق فى التوقيت..
well done >>> w8ing 4 more
Dr Nemo يقول...
ردى عليكى يا ياسمين دمجته فى الجزء الثانى من الموضوع
شكرا لمرورك
Nermien Hani يقول...
عجبنى اوي شرحك لموضوع العفو عن المقدرة
فعلا الانسان لما يعفوا عالاقل هيكسب ثواب من ربنا وربنا هيكون اكرم منه في كرمه مع العبد اللي زيه
وهيكسب احترام اللي عفا عنه حتى لو مبينش ده
انما الانتقام مش هيجيب غير سلسلة انتقامات بعدها
ومعتقدش ان الانتقام هيبقى شيمة من شيم اهل الجنة
ماشاء الله عليك يا ايمن كمل
Dr Nemo يقول...
شكرا يا نيو على مرورك
فعلا انتى قلتى نقطه جميله جدا
انى هكسب احترام اللى قدامى عند العفو عند المقدره
و عمر ما اللى بيعفو هيخسر
لو خسر انسان فهيكسب حب الناس المحيطه و هيكسب الثواب من الله
شكرا لمرورك و يا ريت تنورينا
فى اجزاء الموضع الباقيه
و يا ريت تنورينا دايما
mahmood taha يقول...
نيمو : الصداقة = تضحية
الصداقة مفيهاش زعل
انا صاحبت فلان الفولاني ... و حبيتيه
مهما عمل مش ممكن أتخلي عنه
إلا في حالة واحدة بس
إنه يطلب مني كده
غير كده في حاجة إسمها زعل
أزعل منه ... أكشرله ... أزعقله حتي!!
لكن إني أسيبه ... معتقدش إنه حل سهل خااااااااالص
طالما أنا وافقت إنه يبقي صحبي ... يبقي مفيش حاجة اسمها أسيبه
و أنا بتكلم عن الصاحب ... الصاحب ... مش واحد أعرفة وخلاص
Dr Nemo يقول...
هههههههههههه
بتفكرنى باخاصمك اه اسيبك لا
ماشى يا عم طه
هو ممكن يبقى فى خلافات بس لازم تتحل اول باول عشان يمكن السيطره عليها
و الا هتكبر لمدى لا يمكن التحكم فيه
و لا ايه رايك
mahmood taha يقول...
ههههههههه
فعلاً الأستاذة الفاضلة نانسي عجرم عبرت عن وجهة نظري في شئ من الورعة الأدبية الخلاقة
و طبعاً لازم نخلص كل حاجة أول بأول