قصه ميكروباص
6:26 ص - Posted by Dr Nemo - 12 التعليقات





كنت نازل الكليه زى اى يوم 

ركبت الميكروباص زى اى يوم

بس السواق مكانش زى كل يوم

يا نهار ابيض

انا بركب من السابع 

لغايه ما وصلنا لنورى خطاب بعدها بمحطتين المفروض بيدخل على السادس

راح كمل على رابعه

قلنا ماشى هيحمل العربيه لسه فاضيه

عقبال ما وصل لرابعه كان لسه محملش

المفترض انه يطلع على المنصه و يكمل على نادى السكه

راح دخل يمين ناحيه عباس

انت يا جدع انت

و بدأ الخناق

السكه واقفه

هو لف عشان يدخل امتداد رابعه

يا عم حتى لو عاوز تدخل ادخل على طول

لفيت ليه

عشان الاشاره

اديتنا اتزنقنا اكتر المهم

بعد كثير من الخناق كمل على امتداد رابعه و حمل ناس صلاح سالم

المنطق انه بينزل فى الاخر نفق العروبه و يطلع على صلاح سالم

نزل النفق لقه طلعه صلاح سالم وقفه راح طلع على يوسف عباس

راح الناس اللى كانت نازله صلاح سالم هبت فيه

و هات يا زعيق  و خناق

يقولهم اصل السكه واقفه

قالوله انت بتمشى على مزاجك

انت ليك سكه 

راح قال انا مكنتش اعرف ان محدش معايا صلاح سالم

كنت عاوز اقوم ابطحه

ازاى

اذ كان راكبين من بعد رابعه

و معروف لاى سواق انه بيطلع على صلاح سالم

مش طالعلى يوسف عباس و راجع على المنصه تانى

طبعا اللى كان مفقوع اكتر اللى قاعد جنبه

شغله فى العباسيه و الراجل لففه نص مصر و فى الاخر طلعه تانى على المنصه

و السواق مقتنع ان هو صح

دى المصيبه

الراجل يقوله الشغل و هنتكتب غياب

راح السواق طلعه هو الغلط

المفروض تنزل قبلها بوقت كافى 

كنت عاوز اقوم ابطحه تانى مره

فالراجل بيقوله مفيش حيله فى الرزق اديك لفيت كل اللف ده و فى الاخر محملتش حد

دا حتى بتوع صلاح سالم خدوا اجرتهم تانى

يقوله اسعى يا عبد و انا اسعى معاك

اخر ما زهق الراجل قله

بس خلاص

كده  كده اتكتب غياب

اصلك انت اللى صح و احنا اللى ولاد كلب

فالسواق بيشهد راكب تانى

رجل كبير كده لابس جلابيه و عمه فبيقوله مش فى يا حج عربيات بتروح رابعه

فالراجل بيقوله لا على اللفه بتاعت صلاح سالم دى

فلما الراجل اللى جنب السواق نزل

فالسواق بيقول الراجل ده من ساعه ما ركب و هو مش عاجبه حاجه 

فالراجل ابو جلابيه بيقوله انت الغلط

راح السواق قاله

انت يا عم الحاج ملكش كلام معايا

عشان انت منافق

الراجل سمع الكلمه دى

و يتشال و يتحط

انا منافق دا انت اللى منافق و ستين منافق

و يتشالو يتحط و اتعفرت اوى
قال ايه عشان مقالش ان فى عربيات بتروح رابعه

يا عم انت كملت بعد رابعه محدش بيعمل كده

عقبال ما نزلت

كانت كل العربيه بتتخانق معاه

هههههههههههههههههههههه

المشكله انه بيغلطنا

يلا

الحمد لله

اللى يعيش ياما يشوف


This entry was posted on 6:26 ص and is filed under . You can follow any responses to this entry through the RSS 2.0 feed. You can leave a response, or trackback from your own site.

12 التعليقات:

    Raghda Rashad رغده رشاد يقول...

    انا تهت
    فعلا فعلا دماغى لفت و الله

    حمد لله عالسلامة

    و عرفت تلحق الروند بعد كل ده؟؟!!

  1. ... on 9 مارس 2009 في 11:09 ص  
    2. sara يقول...

    معلش يا ايمن على رايك اللي يعيش ياما يشوف :D

    انا بحب الميكروباصات اللي بتزوغ من الزحمة بس مش للدرجادي :))

    حمدلله على السلامة

  2. ... on 9 مارس 2009 في 11:33 ص  
    3. Dr Nemo يقول...

    الله يسلمك يا رغده
    الحمد لله لحقته
    سبحان الله اليوم ده كنت نازله بدرى

    الحمد لله يا ساره جت سليمه
    المشكله انه مكانش بيهرب من الزحمه
    هو كان عاوز يحمل
    بس ادام محملتش خلاص
    مش هتلف مصر عشان تحمل
    صحيح لا حيله فى الرزق

  3. ... on 9 مارس 2009 في 8:40 م  
    4. Dr.Harmonic يقول...

    و الله على رأيك يا نيمو ..... اللي يعيش ياما يشوف!!
    أكتر مواقف ينطبق عليها مثل "هم يضحك" هي اللي بتحصل مع سواقين الميكروباصات الملاعين دول !!
    المهم لحقت الراوند ولا لأ؟؟؟ ههههههه

  4. ... on 9 مارس 2009 في 11:13 م  
    5. Dr Nemo يقول...

    مش لازم تشتمهم يعنى يا ابو حميد
    الله يهديهم
    على رايك
    انا فى الاخر كنت فطسان على نفسى من الضحك و الناس كلها بتتخانق مع السواق
    اه الحمد لله لحقته

  5. ... on 10 مارس 2009 في 7:14 م  
    6. غير معرف يقول...

    والله يا دكتور أيمن الراجل معذور برضك رزقه وبيدور عليه بس برضك ملهوش حق يلف بيكم كده ويعطلكم عن الشغل والمحاضرات والسكاشن

    بس أنت لو مكانه هتعمل أيه وأنت شايف أن عربيتك اللي هتاكل منها متملتش ركاب وبيتك بيتخرب من واسع

    أنا لو مكانه هرجع لربنا لأني أكيد عملت حاجه غلط و ربنا بيحسسني بيها عشان أتراجع عنها واعود لطريق الصح

    إلا قولي بصحيح يا دكتور مبقتش بتشرفنا في خرباوي يوم أقصد شمساوي ليه

  6. ... on 11 مارس 2009 في 5:52 ص  
    7. Dr Nemo يقول...

    اولا اهلا بيك يا سيدى
    هو عاده فى الاحوال دى
    كان بيكمل على رمسيس باللى فيه النصيب و يحمل من هناك
    بس ده لف
    ماشى لف يا سيدى
    بس لف بحدود
    ملقتش ناس لغايه رابعه خلاص انزل رمسيس عادى و يمكن ربنا يرزقك هناك
    طب و لما كمل و عطلنا و فى الاخر حمل ناس صلاح سالم
    تروح طالع تانى على المنصه
    طب ما نات حملت 2 و لا 3
    نزلهم مكان ما هما عايزين
    و لا عشان السكه زحمه
    مش خرمت دا انت سبت السكه دى و روحت اتجاه تانى خالص
    يلا خيييييييير

    فعلا على رايك
    و من يتق الله يجعل له مخرجا و يرزقه من حيث لا يحتسب

    بالنسبه لشمساوى
    هههههههههه
    يعنى انا تواجدى على شمساوى موسمى
    فى مواسم مبقمش من عليه
    و مواسم بخش اقرا بس
    زى اليومين دول
    يا ريت تنورنا دايما يا سيدى
    سلام عليكم

  7. ... on 11 مارس 2009 في 2:33 م  
    8. غير معرف يقول...

    يادى حواديت المكروباصات
    عمرى مالقيت فيهم سواق عاقل
    ربنا يهديهم يا رب

  8. ... on 11 مارس 2009 في 4:45 م  
    9. Dr Nemo يقول...

    ههههههههه
    هما سواقين الميكروباص كده
    حياتهم كلها مغامرات
    من اللى بيشوفوه
    الناس تشتمهم
    الظباط بيهزئوهم
    محدش عاتقهم

    يلا
    اهلا و سهلا بيكى يا بندقه
    يا ريت تنورينا دايما ان شاء الله

  9. ... on 11 مارس 2009 في 6:35 م  
    10. mahmood taha يقول...

    ههههههههه

    سواقين الميكروباصات بيضحكو عليكو ... عشان أنتو شباب مدينة نصر ههههههه

    عندنا في شبرا إحنا اللي راسمين للسواق خط سيره .. ميقدرش يحود يمين ولا شمال إلا لما ياخد موافقة ال 14 راكب اللي في الميكروباص ....

  10. ... on 13 مارس 2009 في 5:05 م  
    11. Dr Nemo يقول...

    احنا غلابه يا عم
    عندكم يطلعوا عليه بالمطاوى يخلوه يغير رأيه على طول
    هههههههههههههههه
    ماشى يا عم طه

  11. ... on 14 مارس 2009 في 5:15 م  
    12. Dr Gad يقول...
    أزال المؤلف هذا التعليق.
  12. ... on 27 مارس 2009 في 12:05 ص  
إرسال تعليق